بعد يوم مليان سياسة وفن واصحاب ورفاق ،الصبح عند النائب العام للمطالبة بالافراج عن الرفاق المعتقلين احمد سعد ومحمد شفيق ونظرا اننا ملطشة الحكومة الايام دى "والنائب العام ابن بار للحكومة" قعدنا على بابه نستجدى الافراج عن الشباب وبصراحة الجو قصاد باب السيد النائب كان لطيف وطرى بسب الاسقف العاليه والجو برة كان نار فقلنا اهى قاعدة ومش ماشيين لحد على الاقل مانعرف مصير الشباب . لكن الظاهر ان قاعدتنا ما عجبتش سيادة النائب العام وطلب عبر مندوب طبعا " لانه مش ممكن ينزل لمستوانا" اننا نمشى ونيجى كمان ساعتين والاهايجبلنا الامن يطردنا برة . عنها هو قال كدة والناس سخنت وجعرنا كلنا بالصوت الحيانى معتصمون لحد ما ييجى المعتقلون ويبدو والله اعلم ان الراجل اتخض من اصواتنا وبعد اقل من 5 دقايق لاقيناه بيرد علينا عبر وسيط كالعادة بمعلومات عن المقبوض عليهم وانهم اتعرضوا على نيابة امن الدولة ورقم القضية وانهم اخدوا 15 يوم على ذمة التحقيق . المهم ما كدبناش خبر ومشينا عشان نشوف احنا ممكن نعمل ايه عشانهم ورحنا على نقابة المحامين اللى كانت منظمة مؤتمر عن المعتقلين السياسيين .وبعد المحامين قلنا نحضر حفل احياء ذكرى الشيخ امام بنقابة الصحفيين . المهم غنينا واتبسطنا واتفقنا على خطط مظاهرات واعتصامات كتيير عشان نقرف الحكومة اللى ذللانا ومسلطة علينا البلطجية يقطعولنا هدومنا ويضربونا وينتهكوا ادميتنا .
قلنا بقى نروح ننام ونستريح عشان نعرف نغلس ونقرف الحكومة كوييس فى الايام الجاية . ونظرا لاننا بنمشى مع بعضينا يعنى كل شوية اصحاب بيمشوا مع بعض لان زى ما احنا عارفيين ان فى الايام الجميلة دى" ازهى عصور المش عارف ايه .." ممكن يعنى لاقدر الله ان حد يتخطف اويضرب الخ ...من حد مزقوق من حكومتنا المصحصحة والملحلحة والمشخلعة واللى مراقبة التليفونات والموبايلات ويمكن كمان الحمامات.
المهم اتفقت انا وضيا ووائل نروح سوا وفى اخر شارع مجلس الامة فى عابدين وعلى مشارف السيدة تخيلوا وقعنا وقعة سودة...
شفنا ناس قاعدين على قهوة وواحد واقف بيخطب فيهم "مؤتمر سياسى يعنى" الشيطان قالنا نروح نسال ونسمع ايه الموضوع
سالنا واحد واقف على جنب مين الناس دول ياعم ؟ قال دة واحد من حركة كفاية " على الراجل اللى بيخطب فى الناس واللى هانطلق عليه ابو شنب" ولقينا الناس بتدعونا بتصميم نقعد ونسمع ابوشنب وبصراحة احنا استفتينا فضولنا وقولنا نتوكل على الله ونقعد نشوف الناس دى بتقول ايه .
ما تتخضوش حركة كفاية ما تقدرش تعمل كدة لان الحكومة مش هاتسمحلهم بالمساحة دى وطبعا من اول كلمة اتضح انهم حزب وطنى ويبدو والله اعلم ان الحزب اياه نظم دورات تدريبية لتحفيظ حلقات مسلسل عماد الدين والرئيس السحرى لما عماد الدين قعد يدعك يدعك فى الرئيس السحرى عشان يطلع منه اى مارد لكن فى الاخر ما طلعش سحرى ولا حاجة ...
ابو شنب : الرئيس حسنى مبارك هو قائد الضربة الجوية وجمال عبد الناصر قاله انت ايه اللى مقعدك هنا انت لازم تبقى قائد القوات الجوية والسادات كمان اختاره النائب بتاعه معنى كدة ان الراجل كويس وما فيش خلاف عليه كمان هو بقاله 24 سنه فى الحكم واحنا جربناه واحنا عايزينه مدى الحياة لانه انسان محترم
تصفيق حاد ... يقف رجل فى العقد السابع من عمره يهتف
حسنى حسنى حسنى حسنى
ترديد
سرور سرور سرور سرور
ترديد
ابو شنب : نييجى بقى نتكلم عن انجازات الرئيس مبارك البنيه التحتية شبكة الصرف والتليفونات فى ناس تقولك طب ليه ما صرفش الفلوس على الاقتصاد ارد عليه واقوله وهو فى اقتصاد من غير بنية تحتية
تصفيق حاد ... يقف نفس الرجل يهتف
حسنى حسنى حسنى حسنى
ترديد
سرور سرور سرور سرور
ترديد
ابو شنب : فى ناس تقولك لا احنا عايزين تغيير وكفاية كدة واحنا سمعنا عن حركة كفاية وبقولكوا ان المعارضة مطلوبة لازم يا جماعة المعارضة تنبتلها اظافر لان المعارضة فى احيان كتيير بتكون بناءة وبتساهم فى مسيرة الاصلاح بجد .
يتنرفز الرجل اللى بيهتف ويتشنج فى حركة تمثيلية ويقول معارضة ايه وكفاية ايه دول ماجورين وبياخدوا فلوس من الخارج وكلنا عارفين سعد الدين ابراهيم ومركز ابن خلدون وحكايته.
الناس تشده وتهديه ويكمل ابو شنب : انا اقصد المعارضة الوطنية البناءة مش العميلة وانت كلامك مهم وكويس عشان نعرف نوع المعارضة اللى بقصدها انا باقصد احزاب المعارضة الموجودة والى هما شخصيات شريفة وموجودين فى مجلس الشعب آه هما ممكن ينتقدوا الحكومة لكن من اجل المزيد من التقدم مش عشان يوقفوا المسيرة ... ياجماعة احنا لسه هانشوف على ايدين الرئيس مبارك ايام اجمل من اللى فاتت لان رئيسنا عاقل طب شوفوا صدام عمل فى شعبه ايه احنا رئيسنا العالم كله مجمع على احترامه وفى عصره تم اختيار 3 مصريين فى مناصب دوليه مهمة جدا عندك الدكتور فتحى سرور دة قانونى على اعلى مستوى ما فيش زيه ودكتوراه فى القانون استاذ يعنى وعشان كدة اختاروه رئيس برلمانات العالم
تصفيق حاد ....هتاف نفس الراجل
سرور سرور سرور سرور
ترديد
فيه كمان عمرو موسى "رئيس جامعة الدول العربية" دة برضه منصب دولى مهم وفى كتيير غيرهم العالم بيختارهم وقبل العالم ما يختارهم اخترهم الرئيس مبارك بعقله الواعى ونظرته اللى ما تغلطش
هتاف " نفس الهتاف السابق بنفس الشخص "
يجلس ابو شنب بعد التصفيق ويقوم اخر " ابو نضارة " ليتكلم مكانه .
ابو نضارة : انا عايز اضيف على الكلام دة ان الحزب الوطنى مفتوح للنقاش مع كل اطراف المعارضة وبيقبل الراى الاخر ومش صحيح ان احنا بلطجية كل دة تلفيق
يتشنج واحد بانفعال شديد ويقوم يقول حسبى لله ونعم الوكيل فيهم الصورة اللى ظهرت للبت وعليها الرجالة دى صورة متصورة فى اودة ومتلفقه دى صورة مخالف للقوانين يا اساتذة دى مش متصورة فى الشارع حسبى الله ونعم الوكيل فيهم دى ناس سفلة يقطعوا هدمهم ويقولوا الحزب الوطنى انتهكنا فى الشوارع استغفر الله العظيم
الناس تهديه ويجلس ليكمل ابو نضارة كلامه .
ابو نضارة :هما بيقولوا علينا بلطجية واحنا بنقلهم لا احنا بنسمع الراى الاخر وبنرد عليه بالكلمة لان ما فيش اقوى من الكلمة
والكلمة الحقيقية قالها الريس لما طلب من مجلس الشعب يعدل الدستور عشان يرد على الناس اللى قالت احنا عايزين انتخاب بين اكتر من مرشح .
هتاف نفسه بنفس الشخص
بارمى عينى على اخونا ضياء لاقيته رافع ايده وطالب الكلمة "يانهارك اسود مش هانروح النهاردة " نسيت اقولكم ان القهوة بعد ما قعدنا بدات تترشق خلق من عينة سلومة لاقرع اللى مابيرحمش وكانوا بييجوا بالتدريج قال يعنى ماشيين ولاقوا ناس بتتكلم فاجم يسمعوا ومنهم واحد عليه دراع غريب جدا شكله يخوف ولافف عليه من فوق شىء ما مداريه بكم التى شيرت ومش كده وبس دول نفس الخلق اللى بييجوا فى المظاهرات المؤيدة لمبارك لما تكون حركة كفاية عاملة مظاهرة وغالبا كدة هما شموا من اشكالنا اننا بتوع " كفايه" لان كل ما اجى اقوم يمسكوا فينا جامد مصممين اننا نسمع الكلام للاخر كمان صمموا يجبولنا كركديه ساقع واننا لازم نشرب لدرجة انى افتكرت نجمة ابراهيم ومش هاتكلم عن الهلع بالذات بعد ما سلومة لاقرع ما اتحرك ووقف ورايا انا كنت قاعدة على كرسى جنب راجل كبير فى السن واول ما سلومة اتحرك حصلت منى نفضة لاارادية بتوضح انى متوترة الراجل قالى ماتخافيش يابنتى احنا هنا نشيلك فى عيونا ما حدش يقدر يعملك حاجة احنا نحميك
قولتله "من تحت ضرسى" انا واثقة من كدة انتوا ولاد بلد وباين على وشوشكم الطيبة والجدعنة .ناس طيبين صحيح !
المهم ضيا المجنون هايرمى نفسه ويرمينا معاه ارجع يا مجنون كفاية حرام يالا نروح .. ما فيش فايدة دة مصمم يتكلم يا رب استرها بدات استعرض جغرافية الشارع وبابص على العمارة اللى فى ضهرى اكتشفت انى اعرف المصوراتى اللى فى الدور الارضى يا ترى لسه فاتح الساعة كانت 12 ونص او واحدة طب ولو فاتح هايحمينا ولا هايستندل ربنا يستر
كل الناس قالت لابو نضارة الاستاذ عايز يسال خاليه يقوم
وقام ضيا منتفضا ومكشرا عن انيابه وقال ... " تعاليلى يابطة وانا مالى هة " ها ها ها
طبعا محصلش كدة انا بس بعمل فاصل غنائى
وقف ضيا وعلى وشه ابتسامة عريضة وقال كل الكلام اللى اتقال دة كلام جميل جدا جدا " نفس عميق وارتياح ضيا قرر يروش الحمد لله " وانا سعيد انى الاقى الناس على القهوة بيتكلموا فى سياسة البلد كل دة جميل بس انا عندى سؤال مهم .تتتتا ............ اظلام
لسه ما اتضربناش بس دى دماغى اللى عملت الصوت دة
بس قبل ما اسال عايز اوضح نقطة مين هيه حركة كفايه
حركة كفاية مكونة من عدد من الشخصيات اللى فى احزاب المعارضة من ناصريين واشتراكيين واسلاميين وبعضهم اعضاء فى مجلس الشعب الناس انتخبتهم يعنى مش عملا ولا حاجة اما بالنسبة لسعد الدين ابراهيم فهو مش فى حركة كفايه
السؤال هو ليه الريس غير الدستور بعد شهر من تاكيده فى التصريحات ان الدستور مش هايتغير هل ده حصل بسبب ضغط من امريكا ؟
بعد السؤال حصل بلبلة فى القاعدة وبدا البلطجيه يغيروا فى اماكنهم والوجوه تجهمت ولا مؤاخذة وتقدم ابو شنب للاجابة على السؤال بينما نحن نزداد توجسا
ابو شنب : الريس ما بياخدش اى اوامر من امريكا ومواقفه كلها واضحة سواء على مستوى القضايا الخارجية او الداخلية وهو لما لقى فى ناس بتطالب بانتخاب الرئيس بين اكتر من مرشح ولانه ديمقراطى قام طلب من الدكتور فتحى سرور انه يعدل الدستور يا جماعة احنا مش لازم ننسى ان فى عصر الرئيس مبارك لم تغلق جريدة ولم يقصف قلم ولم يسجن احد بسبب اختلافه فى الراى مع الحكومة ولولا ديمقراطية الريس ما كناش سمعنا عن حركة كفاية او ايمن نور او غيرهم ادينا كلنا قاعدين اهو ناس من الشارع وما فيناش واحد بس امن دولة الجيل اللى طلع فى عصر مبارك دة عايش احسن مننا الف مرة انا بعد ما اتخرجت قعدت ادور على شغل اربع سنين لحد ما حفيت فى حد فى الجيل دة حصلوا كدة بسبب الامن والديمقراطية والانجازات الاقتصادية ما بقاش فى حد بيتخرج وما بيلاقيش شغل اوعوا تفتكروا انى الحزب الوطنى او الدكتور فتحى سرور بيقدمولى اى خدمات شخصية عشان كدة انا باييد الحزب الوطنى لا انا باقول كلمة هما يستحقوها ودى كلمة حق لازم تتقال .
هتاف مع تحركات مش طبيعيه خلت ابو نضارة يبادر بانهاء القاعدة قبل ما سلومة لاقرع يرمى كرسى فى الكلوب او فيينا قصره لمينا بعض احنا التلاتة بسرعة وتقدم مننا الاعضاء الموقرون وسلموا عليه بلطف عشان يثبتولى انهم ناس مهذبيين ومش بلطجية اما ضياء فبعد التعليق والسؤال اتعرض للكزات وسلامات من تحت الدرس ونفس السلامات الباردة والنظرات الخبيثة كانت من نصيب وائل وعنها وطلعنا طيران جبال تشيلنا ووديان تحطينا لحد ما حسينا ان احنا مش متراقبين من اى سلومة كل واحد روح على بيته مع الاتفاق على ان كل واحد يكتب اللى حصل على طريقته
وربنا ما يكعبلكوا ابدا فى قهاوى التهييس السياسى
موضوع: مقهى التهييس السياسى 
الأحد فبراير 22, 2009 6:48 am
