amr faNta
عضو فعال
 عدد الرسائل : 66
العمر : 35
المزاج : عيش مهيس .. تموت كويس !!
نقاط : 5822
تاريخ التسجيل : 07/02/2009
 |  موضوع: شعبولا يتحدث !!!!  السبت فبراير 28, 2009 10:30 pm | |
| منقول من صحيفة بلادي
'شعبولا' فنان شعبي سطع نجمه سريعا علي الساحة الفنية له لونة الخاص في الغناء لذلك وجدنا انه من الضروري اجراء حوار معه خاصه انه خرج من حواري منطقة شعبية كالشرابية بالقاهرة.
توجهنا الي منزلة بالمريوطية بشارع الهرم الا انه فضل ان يكون حوارنا في مكانة المفضل بالقهوة التي يمتلكها بجوار منزله, اصطحبنا بسيارته الجيب الفخمة وبعد دخولنا المقهي جلسنا علي مكتب بجوار البوفية وقدم لنا فنجان قهوة وكان لنا معه هذا الحوار:
ابوعصام بتغني بقالك اد ايه؟
بقالي حوالي من 20الي 25 سنة.
ازاي بدات رحلتك مع الغناء؟
انا اتولدت في الشرابية وكنا فاتحين دكان مكوجي وكنت شغال مع ابويا في الدكان وكنت بغني في نفس الحته اللي انا بشتغل فيها لحد ما عملت شريط 'احمد حلمي اتجوز عايدة' والعملية مشيت وشريط في شريط لحد ماعملت شريط 'انا بكره اسرائيل' اللي كسر الدنيا واشتهرت.
ايه سبب اتجاهك للغناء الشعبي بدل العاطفي؟
انا بحب الغنا الشعبي لاني اتولدت في منطقة شعبية واحب الناس البسيطة واحب الغناء لاني انا منهم واديني دلوقت الحمدلله بغني للغلابة واللي مش غلابه .
ايه السر في صراحتك الغنائية؟
مفيش احسن من الصراحة وانا ابويا كان بيقولي دائما ان الكذب لو بينجي يبقي الصدق احسن والصراحة مفيش احسن منها مع انها بتزعل ناس كتير لكن مش مهم إلا يزعل يزعل.
مين مثلك الاعلى فى الغناء الشعبى؟
انور العسكري وكان مكوجي في الدرب الاحمر .
عدوية بيمثلك ايه؟
اخ كبير
طيب ليه مغنتلوش؟
انا مغنتلوش لانه هو لون وانا لون.
مين اكتر مطرب بتحبه؟
جورج وسوف.
اتعرضت لحملات نقد كتير بسبب اسلوبك في المغني وانت مازالت تغني بنفس طريقتك لماذا؟
انا عامل نفسي مطرب الحدث يعني اي حاجة جديدة اتكلم عليها زي السياسة والحشيش والبانجو والسجاير يعني اي حاجة علي الموضة يعني الواحد بيوعي الناس وتبع جو السوق.
يعني الفترة اللي جاية هتكون اغانيك سياسية؟
مش لازم الفترة الي جاية اغاني سياسية زي انا بكره اسرائيل فأنا ارصد كل مايدور في المجتمع وأي مشكلة تواجه الشعب اكون لها بالمرصاد من غير خوف من اي حاجة.
هل الحكومة طلبت منك عدم الغناء عن العبارة؟
لا الحكومة متقدرش تفرض علي حاجة معينة ومطلبتش مني مغنيش عن موضوع العبارة فانا اللي باختار الموضوعات اللي بغنيها.
بعض اعضاء مجلس الشعب تقدموا بطلب لان تكون مطرب الازمات كان ليه ردك؟
انا سمعت فعلا ان اعضاء مجلس الشعب تقدموا بطلب ان اكون المطرب الذي يغني في كل الازمات لتوعية الناس وده اسعدني لكن لم يفاتحني احد منهم في هذا الامر وكل ما يهمني ان الجمهور يحبني ويبقي متكيف مني.
ايه رايك في الفيديو كليب؟
كل واحد ليه لون والفيديو كليب لون من الالون دى.
وليه معندكش كليبات كتير لالبوماتك؟
انا بعمل الحاجات المهمة بس اللي عايزة تشوفها الناس وكمان ما احبش ادخل في حاجات انا مبحبهاش والحاجات دي ليها ناسها.
مين اللي اكتشفك؟
الجمهور اولاد حتتي اول ما غنيت وانا صغير الناس فضلت تصقفلى لحد ماحسسوني اني عبد الحليم حافظ وعشان كده قلت اغني ما اغنيش ليه.
ليه متعملش دويتو مع مطرب شعبي مثل حسن الاسمر او سعد الصغير؟
عمل دويتو مع حسن الاسمر وسعد الصغير موضوع ارفضه تماما فانا لا احب ان اعمل دويتو مع اي مطرب شعبي ولا اعمل دويتو الا مع ابني عصام وانا ارفض العمل مع مطربات خاصة وانا اصبح لي اسم معروف بعد ان نقلت اخباري الـ cnn
والمطرب اللي هاشتغل معاه اغنية لازم يكون ظهر في هذه القناة.
ايه حكاية المسرح والسينما في حياتك؟
السينما اضافت لي الكثير من الجمهور فاللي مبيسمعنيش بيتفرجوا عليا ..اما المسرح فانا دلوقت بشتغل مع سميرغانم وبقف معاه علي خشبه المسرح بعد ما كنت زمان بتفرج عليه وده كرم بتاع ربنا واتعلمت مع سمير غانم حاجات كتير.
بعد فيلمك الاخير مواطن ومخبر وحرامي بتفكر تحترف التمثيل؟
لوجالي فيلم كويس هعمله فانا بيجيلي افلام كثير بس مش بتعجبني انا بدور علي فيلم علي الاقل زي مواطن ومخبر وحرامي.
لو خيرت في بطولة فيلم بين دور الغبي ودور البسيط تختار ايه؟
اختار البسيط لان انا مش همثل لان دي طبيعتي وعيشتي يعني مش مخترع انا بحب اعمل الحاجة اللي انا قدها لاني مش بحب اعمل العنطظة ده حتي يبقي شكلي وحش.
مين اللي قالك انك تنفع تمثل ؟
المخرج داود عبد السيد .
إيه اخر اعمالك اللي شغال فيها؟
استعد اليومين دول لعمل فيلم عن قصة حياتي يكتبة المؤلف إسلام خليل اللي انتهي من جزء كبير منه ولغايه دلوقتي مستقرتش علي المنتج اللي هيصرف علي الفيلم وعموما الفلوس مش مشكلة.
مين اللي هيشترك في بطولة الفيلم معاك؟
محددتش لغاية دلوقتي مين اللي هيشترك معايا في الفيلم وإن كانت استقريت علي الفنانين تامر عبد المنعم وصلاح عبدالله بالاضافة الي البطلة والترشيحات هتكون بين منه شلبي اومنه فضالي او وفاءعامر او الفنانة اللي فاضيه اللي هتختار العمل.
قصة الفيلم هدور حوالين ايه بالضبط؟
الفيلم هيحكي رحله كفاحي اللي مريت بيها من المكواه الي الشهرة والنجومية وابني خميس هيمثل معايا وهيجسدني وانا صغير وهيحكي حكاية المهن اللي اشتغلت فيها مثل حداد مسلح ،مبيض محاره،نجار،مبلط،بائع بطاطا،بائع فاكهة وخضار لان حكاية المكوجي بقت قديمة.
قلت فى حديث لك فى التليفزيون انك نجم الميكروباصات كنت تقصد ايه؟
انا كان جمهورى الاول سواقين الميكروباص وكانوا هم االكثر كنت عامل شريط احمد حلمى اتجوز عايدة للمواقف عشان كده كانوا هم اكثر ناس بتشغله.
فكرت انك تغير شكلك الغنائى؟
معرفش .. ليه اغير لونى او شكلى ولو غيرته محدش من الناس هيعرفنى.
بتحس بالقرب من الحرافيش والمهمشين؟
انا مقدرش اقول على جمهورى الناس الغلابة حرافيش.
ياابو عصام دى مش شتيمة...
انا عن نفسى معرفش معناها ومقدرش اقول عليهم كده وبلاش السؤال ده.
ايه اللى نفسك يعملوه الفنانون للناس الغلابة؟
انهم يروحوا ليهم ويغنوا ليهم يعنى انا لو رايح فى حفلة لاى سجن الاقى 3 نمر لعمرو دياب وحكيم وايهاب توفيق.
ليه اغلب اغانيك فى السياسة؟
ماانت شايف الناس كل يوم تفتح التليفزيون تلاقى نشرة الاخبار فيها ناس ميته فى العراق وفلسطين.
ليه انت الوحيد اللى بيغنى بالصراحة دى؟
يمكن لانى الوحيد اللى حاسس باللى بيحصل.
هل مازلت مع اولاد حتتك فى الشرابية بعد مابقيت مشهور؟
وزيادة كمان ولما اروح فرح ماخدش فلوس
ايه رأيك فى الاغانى الجديدة؟
احنا شعب تبع الجو اللى ماشى والاغانى بتاعة اليومين دول تتميز بالسرعة وماشية مع العصر اللى احنا فيه ولها جمهورها ومفيهاش تكاليف بالنسبة للهدوم يعنى تلاقى البنت بتغنى بربع متر قماش..
ايه الجديد فى لبسك؟
الجديد ان لبسى بشتريه من وكالة فى باريس وافصله فى وكالة البلح وحاليا جالى بدلة وحزام من هناك.
ايه هوايتك المفضلة؟
هوايتى المفضلة انى معرفش انام الا على البابور العادى فلازم اشغله قبل ماانام حتى اصحى وانا كمان ساعات بطبخ لنفسى عليه.
بتقضى ايامك ازاى؟
حياتى عادية جدا انا بعشق النوم انام بالنهار واصحى بالليل واذا كنت مرتبط بفرح اروحه ولو مفيش بروح كازينو بشارع الهرم لان عندى فقرة ثابتة هناك. | |
|
